Maharashtra Public Holiday 2026 : २०२६ सालासाठी सार्वजनिक सुट्ट्यांची सविस्तर यादी

महाराष्ट्र : २०२६ सालासाठी सार्वजनिक सुट्ट्यांची राजपत्र अधिसूचना जाहीर; भाऊबीजची अतिरिक्त सुट्टीही संमतीप्राप्त

मुंबई: महाराष्ट्र शासनाने आगामी वर्ष २०२६ साठी महाराष्ट्रातील सार्वजनिक आणि शासकीय सुट्ट्यांचे अधिकृत कॅलेंडर जाहीर केले आहे. सामान्य प्रशासन विभागामार्फत ५ डिसेंबर २०२५ रोजी यासंदर्भातील राजपत्र अधिसूचना जारी करण्यात आली असून, परक्राम्य संलेख अधिनियम, १८८१ (१८८१ चा २६) च्या कलम २५ अन्वये मिळालेल्या अधिकारांचा वापर करून सन २०२६ साठी एकूण २४ सार्वजनिक सुट्ट्या अधिकृतपणे घोषित करण्यात आल्या आहेत. या सर्वसमावेशक सुट्ट्यांच्या यादीमुळे नागरिकांना, कर्मचाऱ्यांना तसेच व्यापारी व औद्योगिक क्षेत्राला आगामी वर्षाचे नियोजन करणे सोयीचे ठरणार आहे.

सुट्टीच्या अधिसूचनेची कायदेशीर पार्श्वभूमी

भारत सरकारच्या गृह मंत्रालयाने ८ मे १९६८ रोजी जारी केलेल्या अधिसूचना क्रमांक ३९/१/६८-जेयुडीएल/तीन अन्वये महाराष्ट्र शासनाकडे जे अधिकार सोपविण्यात आले होते, त्या अंतर्गत ही अधिसूचना काढण्यात आली आहे. राज्याचे उपसचिव हेमंत महाजन यांच्या स्वाक्षरीने ही अधिसूचना जारी करण्यात आली असून, राज्यपाल यांच्या आदेशानुसार व नावाने ती लागू करण्यात आली आहे. या अधिसूचनेची प्रत उच्च न्यायालयाचे महाप्रबंधक, महालेखापाल, सर्व विभागीय आयुक्त, जिल्हाधिकारी, जिल्हा परिषदांचे मुख्य कार्यकारी अधिकारी तसेच रिझर्व्ह बँक ऑफ इंडिया आणि मध्य व पश्चिम रेल्वेच्या महाव्यवस्थापकांसह विविध प्रमुख प्रशासकीय विभागांना पाठवण्यात आली आहे.

वर्ष २०२६ मधील सार्वजनिक सुट्ट्यांची सविस्तर यादी

महाराष्ट्र शासनाच्या राजपत्रानुसार २०२६ मध्ये येणाऱ्या प्रमुख सार्वजनिक सुट्ट्यांची महिन्यानुसार व वारांनुसार सविस्तर आकडेवारी खालीलप्रमाणे आहे:

जानेवारी २०२६: प्रजासत्ताक दिन:  २६ जानेवारी, २०२६ (वार: सोमवार, भारतीय सौर दिनांक: ६ माघ, शके १९४७)
फेब्रुवारी २०२६: महाशिवरात्री:  १५ फेब्रुवारी, २०२६ (वार: रविवार, भारतीय सौर दिनांक: २६ माघ, शके १९४७)
छत्रपती शिवाजी महाराज जयंती:  १९ फेब्रुवारी, २०२६ (वार: गुरुवार, भारतीय सौर दिनांक: ३० माघ, शके १९४७)

मार्च २०२६: होळी (दुसरा दिवस): ०३ मार्च, २०२६ (वार: मंगळवार, भारतीय सौर दिनांक: १३ फाल्गुन, शके १९४७)
गुढीपाडवा: १९ मार्च, २०२६ (वार: गुरुवार, भारतीय सौर दिनांक: २८ फाल्गुन, शके १९४७)
रमझान ईद (ईद-उल-फितर) (शव्वल-१): २१ मार्च, २०२६ (वार: शनिवार, भारतीय सौर दिनांक: ३० फाल्गुन, शके १९४७)
रामनवमी: २६ मार्च, २०२६ (वार: गुरुवार, भारतीय सौर दिनांक: ०५ चैत्र, शके १९४८)
महावीर जन्म कल्याणक: ३१ मार्च, २०२६ (वार: मंगळवार, भारतीय सौर दिनांक: १० चैत्र, शके १९४८)

एप्रिल २०२६: गुड फ्रायडे:  ०३ एप्रिल, २०२६ (वार: शुक्रवार, भारतीय सौर दिनांक: १३ चैत्र, शके १९४८)
डॉ. बाबासाहेब आंबेडकर जयंती:१४ एप्रिल, २०२६ (वार: मंगळवार, भारतीय सौर दिनांक: २४ चैत्र, शके १९४८)

मे २०२६: महाराष्ट्र दिन: ०१ मे, २०२६ (वार: शुक्रवार, भारतीय सौर दिनांक: ११ वैशाख, शके १९४८)
बुध्द पौर्णिमा: ०१ मे, २०२६ (वार: शुक्रवार, भारतीय सौर दिनांक: ११ वैशाख, शके १९४८)
बकरी ईद (ईद-उल-झुआ):  २८ मे, २०२६ (वार: गुरुवार, भारतीय सौर दिनांक: ०७ जेष्ठ, शके १९४८)

जून २०२६: मोहरम:  २६ जून, २०२६ (वार: शुक्रवार, भारतीय सौर दिनांक: ०५ आषाढ, शके १९४८)
ऑगस्ट २०२६: स्वातंत्र्य दिन: १५ ऑगस्ट, २०२६ (वार: शनिवार, भारतीय सौर दिनांक: २४ श्रावण, शके १९४८)
पारशी नववर्ष दिन (शहेनशाही): १५ ऑगस्ट, २०२६ (वार: शनिवार, भारतीय सौर दिनांक: २४ श्रावण, शके १९४८)
ईद-ए-मिलाद: २६ ऑगस्ट, २०२६ (वार: बुधवार, भारतीय सौर दिनांक: ०४ भाद्रपद, शके १९४८)

सप्टेंबर २०२६: गणेश चतुर्थी:  १४ सप्टेंबर, २०२६ (वार: सोमवार, भारतीय सौर दिनांक: २३ भाद्रपद, शके १९४८)
ऑक्टोबर २०२६: महात्मा गांधी जयंती: ०२ ऑक्टोबर, २०२६ (वार: शुक्रवार, भारतीय सौर दिनांक: १० आश्विन, शके १९४८)
दसरा:  २० ऑक्टोबर, २०२६ (वार: मंगळवार, भारतीय सौर दिनांक: २८ आश्विन, शके १९४८)

नोव्हेंबर २०२६: दिवाळी अमावस्या (लक्ष्मीपूजन): ०८ नोव्हेंबर, २०२६ (वार: रविवार, भारतीय सौर दिनांक: १७ कार्तिक, शके १९४८)
दिवाळी (बलिप्रतिपदा): १० नोव्हेंबर, २०२६ (वार: मंगळवार, भारतीय सौर दिनांक: १९ कार्तिक, शके १९४८)
गुरुनानक जयंती: २४ नोव्हेंबर, २०२६ (वार: मंगळवार, भारतीय सौर दिनांक: ०३ मार्गशिर्ष, शके १९४८)

डिसेंबर २०२६: ख्रिसमस: २५ डिसेंबर, २०२६ (वार: शुक्रवार, भारतीय सौर दिनांक: ०४ पौष, शके १९४८)

बँकांसाठी विशेष मर्यादित सुट्टी

सामान्य सार्वजनिक सुट्ट्यांवतिरिक्त, बँकिंग क्षेत्रासाठी एक विशेष सुट्टी देखील घोषित करण्यात आली आहे. बँकांना आपले वार्षिक लेखे पूर्ण करता यावेत (Annual Closing of Accounts), यासाठी १ एप्रिल, २०२६ रोजी (वार: बुधवार, भारतीय सौर दिनांक: ११ चैत्र, शके १९४८) बँकांना सुट्टी असेल. राजपत्रानुसार स्पष्ट करण्यात आले आहे की, ही सुट्टी केवळ बँकांसाठी मर्यादित असून शासकीय कार्यालयांसाठी लागू असणार नाही.

‘भाऊबीज’ निमित्त अतिरिक्त सुट्टीची घोषणा

महाराष्ट्र शासनाने सुरुवातीला २४ सार्वजनिक सुट्ट्यांची अधिसूचना जारी केल्यानंतर, राज्य शासकीय कार्यालये, राज्य शासनाचे उपक्रम तसेच स्थानिक स्वराज्य संस्थांच्या कर्मचाऱ्यांसाठी एका अतिरिक्त सुट्टीची भर घातली आहे.

 भाऊबीज :  ११ नोव्हेंबर, २०२६ : भारतीय सौर दिनांक: २० कार्तिक, शके १९४८ वार: बुधवार

ही अतिरिक्त सुट्टी राज्य शासकीय कार्यालये, राज्य शासनाचे उपक्रम, महानगरपालिका, नगर परिषद, नगर पंचायत, जिल्हा परिषद, पंचायत समिती आणि ग्रामपंचायत यांच्या कार्यालयांसाठी लागू राहील. या निर्णयामुळे भाऊबीजाच्या सणासाठी शासकीय यंत्रणेतील कर्मचाऱ्यांना मोठा दिलासा मिळाला आहे.

शासकीय परिपत्रक (सामान्य प्रशासन विभाग क्र. सवदसु-११९६/प्र.क्र.५/९६/२९, दिनांक १८ सप्टेंबर १९९६) अन्वये, मुंबई शहर आणि मुंबई उपनगर जिल्ह्यांमधील शासकीय व अशासकीय कार्यालयांसाठी ‘अनंत चतुर्दशी’निमित्त दरवर्षी स्थानिक सुट्टी जाहीर करण्यात येते; तसेच, २००७ पासून ‘गोपाळकाला (दहीहंडी)’ निमित्तही या जिल्ह्यांसाठी स्थानिक सुट्टी जाहीर करण्यात येत आहे. त्यानुसार, वर्ष २०२६ साठी मुंबई शहर आणि मुंबई उपनगर जिल्ह्यांमधील सर्व शासकीय व अशासकीय कार्यालयांसाठी खालीलप्रमाणे स्थानिक सुट्ट्या जाहीर करण्यात येत आहेत:

१ | गोपाळकाला (दहीहंडी) | ०५ सप्टेंबर २०२६ | १४ भाद्रपद, शके १९४८ | शनिवार
२ | अनंत चतुर्दशी | २५ सप्टेंबर २०२६ | ०३ अश्विन, शके १९४८ | शुक्रवार

२. हे आदेश मुंबई शहर आणि मुंबई उपनगर जिल्ह्यांमध्ये स्थित राज्य शासनाच्या आणि अशासकीय कार्यालयांना लागू राहतील.
३. उपरोक्त स्थानिक सुट्ट्या या शासन निर्णय क्र. P&S No. P-13/II/B, दिनांक ५ नोव्हेंबर १९५८ मधील तरतुदींनुसार जाहीर करण्यात आल्या आहेत. ४. हे वेळापत्रक महाराष्ट्र शासनाच्या संकेतस्थळावर (www.maharashtra.gov.in) संदर्भ क्रमांक (reference code) 202512091731428607 अंतर्गत उपलब्ध करून देण्यात आले आहे. हा आदेश डिजिटल स्वाक्षरीसह निर्गमित करण्यात येत आहे.

प्रसार आणि प्रचार निर्देश

माहिती व जनसंपर्क महासंचालनालयाला या अधिसूचनेच्या आधारे योग्य ते प्रसिद्धिपत्रक निर्गमित करण्याचे तसेच आकाशवाणी व दूरदर्शनच्या माध्यमातून या सुट्ट्यांच्या सूचीला नागरिकांपर्यंत पोहोचवण्यासाठी विस्तृत प्रचार करण्याचे निर्देश देण्यात आले आहेत. याद्वारे सर्वसामान्य नागरिक, विद्यार्थी आणि खासगी-शासकीय क्षेत्रातील कर्मचाऱ्यांना २०२६ मधील सण-उत्सव आणि सुट्ट्यांचे नियोजन करणे शक्य होणार आहे.