दिल्लीऐवजी मुंबईतूनच आंदोलनाचा एल्गार का? CJP प्रमुख अभिजित डिपके यांनी सांगितले मोठे कारण

मुंबई: मुख्य निवडणूक आयुक्त (CEC) ज्ञानेश कुमार यांच्या राजीनाम्याची मागणी आणि निवडणूक आयोगाच्या कारभाराविरोधात कॉक Roach जनता पक्षाने (CJP) मुंबईतील छत्रपती शिवाजी महाराज पार्क येथे ‘जेल भरो आंदोलन’ पुकारले आहे. दिल्लीतील जंतर-मंतरवरील आंदोलनानंतर आता हे नवे आंदोलन थेट दिल्लीतून सुरू न करता मुंबईतून का सुरू करण्यात आले, याचे कारण CJP चे संस्थापक अभिजित डिपके यांनी स्पष्ट केले आहे.

महाराष्ट्राच्या राजकीय समीकरणांचा संदर्भ

या आंदोलनाची सुरुवात मुंबईतून करण्यामागची भूमिका स्पष्ट करताना अभिजित डिपके म्हणाले, “२०२४ च्या लोकसभा निवडणुकीत महाराष्ट्रात भाजपला ४८ पैकी केवळ ९ जागा मिळाल्या होत्या, मात्र अवघ्या सहा महिन्यांत झालेल्या विधानसभा निवडणुकीत संपूर्ण चित्र पूर्णपणे बदलले. हा बदल नेमका कसा झाला ?” याच राजकीय पार्श्वभूमीचा हवाला देत त्यांनी मराठी म्हणीचा धागा पकडत स्पष्ट केले की, “दिल्लीचे हे तख्त राखतो महाराष्ट्र माझा.” याच कारणामुळे या आंदोलनाची सुरुवात दिल्लीऐवजी थेट मुंबईतील छत्रपती शिवाजी महाराज पार्क येथून करण्यात आली आहे.

परवानगी नाकारल्यानंतरही आंदोलनावर ठाम

मुंबई पोलिसांनी या आंदोलनासाठी परवानगी नाकारली असली, तरी ब्रिटिशांच्या काळातील आंदोलनांचा दाखला देत डिपके यांनी माघार घेणार नसल्याचे स्पष्ट केले. ते म्हणाले, “आम्ही सत्तेत असलेल्यांविरुद्ध लढत आहोत… महात्मा गांधींनी ब्रिटिशांविरुद्ध लढा दिला, तेव्हा ब्रिटिशांनी त्यांना कधी आंदोलनाची परवानगी दिली होती का?” मुंबईच्या ऐतिहासिक पार्श्वभूमीची आठवण करून देत ९ ऑगस्ट १९४२ रोजी गवालिया टॅंक (ऑगस्ट क्रांती मैदान) येथून महात्मा गांधींनी पुकारलेल्या ‘छोड़ो भारत’ आंदोलनाचा संदर्भ त्यांनी दिला.

मुंबईतील या आंदोलनानंतर हे अभियान देशातील इतर प्रमुख शहरांमध्ये जसे की गोवा, कोलकाता, बंगळुरू आणि रांची येथे नेले जाईल आणि मुख्य निवडणूक आयुक्त ज्ञानेश कुमार जोपर्यंत पद सोडत नाहीत, तोपर्यंत हा लढा सुरूच राहील, असा इशारा CJP कडून देण्यात आला आहे.

शिवाजी पार्कमधील CJP च्या आंदोलनाला मुंबई पोलिसांकडून परवानगी नाकारण्याचे कारण काय ?

मुख्य निवडणूक आयुक्त (CEC) ज्ञानेश कुमार यांच्या राजीनाम्याच्या मागणीसाठी कॉक Roach जनता पक्षाने (CJP) २ ऑक्टोबर रोजी मुंबईतील छत्रपती शिवाजी महाराज पार्क येथे पुकारलेल्या ‘जेल भरो आंदोलन’ आंदोलनाला मुंबई पोलिसांनी परवानगी नाकारली होती. पोलिसांकडून परवानगी नाकारण्यामागे प्रामुख्याने खालील कारणे देण्यात आली आहेत:

• उच्च न्यायालयाचे निर्देश: बॉम्बे हायकोर्टाच्या २०१३ मधील एका आदेशानुसार आणि त्यानंतरच्या महाराष्ट्र शासनाच्या मार्गदर्शक तत्त्वांनुसार, शिवाजी पार्क मैदानावर खेळाशिवाय इतर कोणत्याही गैर-क्रीडा उपक्रमांवर (Non-sporting activities) कडक प्रतिबंध घालण्यात आले आहेत.

• महानगरपालिकेची (BMC) मंजुरी नसणे: आंदोलनकर्त्यांनी मैदान वापरण्यासाठी आवश्यक असलेली पालिकेची (BMC) कोणतीही पूर्वपरवानगी घेतली नव्हती.

• शांतता क्षेत्र आणि वाहतूक कोंडीची समस्या: शिवाजी पार्क परिसर हा रहिवासी आणि ‘शांतता क्षेत्र’ (Silence Zone) म्हणून घोषित आहे. याठिकाणी मोठ्या प्रमाणावर गर्दी जमल्यास तीव्र आवाज व ध्वनी प्रदूषण होऊ शकते. तसेच, यामुळे परिसरातील गंभीर वाहतूक कोंडी होऊन नजीकच्या रुग्णालयांमध्ये जाणाऱ्या रुग्णांच्या सुविधेत अडथळा निर्माण होऊ शकतो, असे कारण पोलिसांनी दिले.

पोलिसांनी स्पष्ट केले होते की, शिवाजी पार्क हे राजकीय सभा किंवा आंदोलनांसाठी नसून केवळ खेळांसाठी राखीव आहे. असे असतानाही CJP ने आपल्या भूमिकेवर ठाम राहत हे आंदोलन छेडण्याचा इशारा दिला होता.